Barcelona

Þeir sem til þekkja vita að ég er vanaföst eins og nautið sem ég er. Því var það erfið ákvörðun að yfirgefa hann central vin minn eftir 3ja ára farsælt samband. Það var eitthvað sérstaklega heimilislegt við ljóta bleika litinn og mottóið að komast af með sem minnst átti vel við í þessu tilfelli. Íhaldssemin kristallaðist í bleika litnum. En ekki má gleyma því að blog.central.is  er takmarkað en passaði svo sem vel við stirða tölvukunnáttu mína. Þeir sem hafa séð til mín vinna skjöl í Word vita hvað ég á við. Það þarf því enginn að halda að ég hafi komið þessari mynd hér inn á hausinn sjálf, nei ekki eina einustu mínútu. Og myndin hér að neðan….o nei! En inn er hún komin með eftirfarandi sögu.

Jú ég er í Barcelona og það er yndislegt. Líkt og aðrar ungpíur Íslands slæ ég ekki slöku við þegar gengið er fram hjá aljþóðlegum sem og spænskum verslunarkeðjum með litlum árangri þó. Spænskar dúkkustærðir eru ekki hannaðar fyrir mína upphandleggi og hvað þá á mína “stuttu” leggi sem hingað til hafa ekki þurft að súpa seyðið af því að vera smáir. Og það væri hægt að halda áfram því bygging norrænna kvenna virðist vera virkilega á skjön við þá suðrænu því jafnvel skórnir eru of grannir fyrir táberg sem passar í Nokia stígvél. En nóg af misjöfnum búðarferðum…..

Þessa mynd tók Bjarni af “mér”fyrsta dag ferðarinnar. Eitthvað hafa spænsku stærðirnar leikið greyið stúlkuna grátt (það skal tekið fram að báðar vorum við grunlausar um aðal myndefni tiltekinnar myndar) nema ekki sé gert ráð fyrir því að leggja sig í spænskum klæðnaði á jafnsléttu. Já mér er spurn.